أبطال الحكاية:
أبقراط: أبو الطب
كونفيشيوس: أبو الفسلسفة
اللمبي: أبو الهبل
انا : أبو ضياء
المكان: قهوة شعبية في بدروم كلية طب سوهاج, تحت المشرحة على طول.
الزمان: الساعه 6 الصبح قبل صلاة المغرب, في الألفية اللي قبل اللي فاتت.
الحكاية:
يدخل أبو ضياء القهوة كعادته مبكرا, ولكنه يجد كلا من كونفوشيوس وأبقراط واللمبي, وقد سبقوه في حادثه لم يكن لها مثيل من قبل إلا في الحوادث والمصائب.
أبو ضياء:
السلام عليكم , خير يا جماعه , ايه اللي حصل كفالله الشر.
كونفيشيوس:
عمك أبقراط يا سيدي, مصحينا من النوم وقارف أهالينا, قال ايه عايز يفتكس حاجة جديده في الطب ومش لاقي, فنادانا كلنا.
اللمبي:
وبعدين ان بتسأل ليه ؟؟ مش جيتلك وحطتلك الجواب في الصندوق اللي قدام بيتكم؟
أبو ضياء:
صندوق مين يا اهبل انت, دي الزباله, مالك يا أبقراط قالقنا ليه بس؟
أبقراط:
العيال تلاميذي ولاد الصرمه, كل ما اعلمهم حاجه , يادوبك هي ساعه ويحفظوها, وييجوا يقلقوني ويقوموني من على حجرين المعسل بتوعي, قال ايه عايزين تاني , يرضيك كده؟!
أبو ضياء:
ما أنا قلتلك يا ابقراط , طب من بقك, وسيبك من العك ده, هو احنا مش هنخلص من الطب وسنينه.
أبقراط:
تعرف انا اتعلمت الطب من طفولتي لغاية ما عجزت, دول كده هيتعلموه بسرعه, والطب هيبقى في النازل.
كونفييشيوس:
يا لمبي قوم وصيلنا على حجرين شيشة تقاح, ووصي عليهم.
اللمبي:
حاضر يا معلمي................ " ايه الجماعه الخيخة دول, ماله القص ولا السلوم".
وتترص الشيشة, ووفجأة يسحب كونفيشيوس نفسا عميقا ,فتتعالى اصوات كركرة الشيشة لتصمت جميع من في القهوة, ثم يطلق كونفيشيوس الدخان ليعم كل المكان, وتنتشر رائحه الدخان أبو تفاح.
كونفيشيوس:
أنا جاتلي فكرة بنت جهنمية يا عم أبقراط.
ترتسم الابتسامة على وجه ابقراط ويكمل كونفيشيوس قائلا:
بص يا معلم, انت المرة الجاية, تغير اسماء الحاجة, مثلا المعده تسميها شخشعونه, والعضم تسميه بشترينونة, أي هبل في الجبل, المهم الطالب هيسمع من هنا, ويبلم من هنا, وحلني بقى على ما يحفظوها.
اللمبي:
يا عم وحالتك بطل "فسللتك" الفاضية دي, وجعت دماغنا.
أبقراط يسحب نفسا هو الآخر من الشيشية, ولكن ليس بقوة كونفيشيوس ويقول:
يا عم كونفيشيوس , هي فكرة جامده, بس هقع في مشكله تاني, العيال مش هيسوبوني في حالي , وهيخلوني أكررها, والافتكاسات انا نفسي مش هعرف افتكسها.
اللمبي:
يا عم انت ما تصدعناش, مش انت كنت ناوي تكتب "البط ولا الوز" بتاعك ده في كتب, افتكس على الكتب وخليهم يذاكروا منها.
ابقراط:
يا ابن الهبلة, جبتها ازاي دي, والله عندك حق, اهه كده الكلام ولا بلاش.
ويسحب كلا من ابقراط وكونفيشيوس من الشيشه وينفثان الدخان ولكن تستمر كركرة شيشة اللمبي إلا ما لا نهاية.
ويقف أبو ضياء صارخا:
حرام عليكم , حرام عليكم, ولكن لا أحد يسمعه من صوت كركرة شيشة اللمبي.
وفي النهاية يستيقظ أبو ضياء مفزوعا من هذا الكابوس.
ملاحظات:
-الحقيقة تقال, أن أبو قراط هو أول اصحاب فكرة تدوين الكتب بالفعل.
-أما حكاية الاسماء الصعبة فهي حقيقية كذلك, حتى يبذل الطالب فيها مجهود أكبر ولا ينساها بعد ذلك,ولكنني لا أعلم صاحب هذه الفكرة, ربنا يجازي اللي كان السبب.
