الحب في شارع المشرحه

الحب في شارع المشرحه له طابع خاص, فشارع المشرحه في طب سوهاج مختلف تماما عن أي شارع في اي كلية في اي حتة في العالم

جغرافية شارع المشرحه

شارع ينقسم إلى قسمين, يفصل ما بينهم خط أخضر من الزرع, ولكنه يسمى الخط الاحمر مع ان لونه أخضر, يتخلله ثغرات تسمح لمرور البنات من منطقتهم إلى السكاشن, النصف الملاصق للمشرحه من ناحية الشرق (جنب الكافيتيريا كده ) يحتله الاولاد, أما الجزء الملاصق لكلية العلوم من ناحية الغرب فيحتله البنات, وتسمى تلك المنطقه, شجرة علوم طبعا فهمتوا ليه اسمه الخط الاحمر

مراحل الحب

المرحلة الأولى

يدخل الطالب الكلية العظيمة بتاعتنا وهو مشمر ايده, عايز يتعرف على اول بنت حلوة يشوفها قدام عينه, ممكن ما تعجبهوش بنات دفعته, فيضطر يستنى سنه ولا اتنين, المهم انه يلاقي البنت اللي في دماغه, واول ما يلاقيها بيحس ان قلبه طار من الفرحه

المرحلة الثانيه

يتغير حال هذا الطالب 180 درجه, تلاقوه بقى ينزل محاضرات ويستنى مواعيد السكاشن, ما تستغربوش قوي كده, لأنه طبعا بيستنى مواعيد سكاشن البنت , مش مواعيده هو, وتلاقيه فرحان ومبسوط, وتلاقيه بيقول في نفسه, أخيرا لقيت هدف عشان انزل الكليه

المرحلة الثالثه

ينتظر الطالب يوميا ان تطل عليه حبيبته, ينتظر وينتظر, إلى ان يأتي ميعاد السكشن, فتضطر آسفة أن تعبر الخط الأحمر, حتى تستطيع المرور إلأى السكشن, وفي هذه اللحظة ترد إليه روحه, حيث انه رآها أخيرا بعد طول فراق

قد تستمر هذه المرحلة من سنه إلى ثلاث سنوات

المرحلة الرابعه

يبدأ الطالب مرحلة البحث والتمحيص, ويسأل كل من قد يعرف عنها معلومة, وتكون غالبا المعلومة الأكبر وهمه الوحيد, هو اسمها ايه؟؟؟, فمش معقولة يقعد يحب في واحده سنتين وهو حتى مش عارف اسمها, ويا سلام أول ما يعرف اسمها, تلاقيه طاير من الفرحه وبيقول لكل اصحابه, ده كمان ممكن يجيب ميداليه بأول حرف من اسمها

وهذه المرحلة تستغرق من اسبوع إلى 6 أشهر

المرحلة الخامسه

ملحوظة: أغلب العاملين في الأسر وفي الجمعيه العلمية سمسا, هم أرفع من هذه الصفات القادمه, ولكن بالطبع هناك استثناءات

يبدأ الطالب في البحث عن حجة لكي يتكلم مع محبوبته, فتكون أول الأفكار التي نخطر في باله, هو أن ينسب نفسه إلى أحد الأسر أو الجمعية العلميه, حتى يسنح له الكلام معها في الأنشطه, حتى ولو لم يكن له صلة بالجمعيه أو بالأسرة التي نسب نفسه إليها, وفي هذه المرحلة تلاحظ الفتاه في الغالب انها فتاة أحلامه, حيث يصادف أنها الفتاة الوحيده وسط كل فتيات الكلية التي يكلمها صاحبنا ده, " يعني بيتفقس بيتفقس" , وهنا تختلف رد فعلها على حسب رغبتها, بالموافقة أو بالرفض

المهم انه بيفضل يتردد عالمسكينه من 5 إلى 6 مرات في السنه, لمدة سنتين عالأقل, في معدل من 30 ثانية إلى 3 دقائق في المقابلة الواحده,وفي الفترات البينيه, في الغالب يتبادلان النظرات, اللي ماحدش فيهم بيبقى فاهم التاني

المرحلة السادسه

في المرحلة دي يكون صاحبنا خلاص تعب ومش فاهم حاجة, ويضطر آسفا انه يوصلها اعجابه بطريقة مباشرة" يتصل بيها" أو غير مباشرة " عن طريق الاصحاب,هو هو الصاحب ليه عند صاحبه ايه؟",وبالطبع يأتي الرد من الفتاه في الاول بالتردد والخوف, ولو استطاع اقناعها, سينتقلون للمرحلة القادمة

قد تستمر مرحلة الاقناع شهورا من الخريف, وتعبا نفسيا عظيما, مع ان في الغالب هما الاتنين بيكونوا عايزين بعض, بس تقول ايه بقى, تقل بنات

المرحلة السابعه

يبدأوا يتعرفوا على بعض أكتر, لكن بحكم الظروف ما ينفعش يقابلوا بعض, فبيتعرفوا على بعض يا اما بالشات , يا اما بالتليفون, بس في الغالب بيبقى الشات أوفر, يا اما يشتريلها خط موبينيل ويكلمها بليل ب 5 قروش للدقيقة

المرحلة دي بتطول اوي على فكرة, لغاية ما يحسوا انهم معاهم مرتب كويس, ينفع يعيشهم, مش عايز احبطكم, وخلينا نكمل

المرحلة الثامنه

مكالمة تليفون

هي: مش كفاية بقى يا حبيبي, احنا اتعرفنا على بعض, وكل واحد عرف التاني كويس, مش تيجي تخطبني

هو: والله يا حبيبتي انتي عارفة الظروف, انا يا دوب في مخلص امتيازي, ولسه الجيش والتكليف والذي منه, وربك يسهلها

هي: بس تعالى اتقدم وربك يسهلها

هو: اتقدم ازاي بس يا حبيبتي, هو انا حيلتي حاجة

هي: امال الشهادة اللي معاك بتعمل بيها ايه

هو: ببلها واشرب ميتها كل يوم عالريق, يمكن أنسى

هي: وحصلها ايه الشهاده؟؟؟؟؟

هو: ولا حاجة, زي ما هي, حتى الحرق مش نافع فيها

هي: الحمد لله انها سليمة, دي هي الامل الوحيد, بس انت تعالى وربك يسهلها, واللي خلاك تصبر ده كله, اكيد هتستحمل القعده بتاعت الخطوبة

طبعا ممكن يكونوا من ساعه آخر مقابلة ليهم اللي كانت من سنتين ما شافوش بعض, بس المهم انهم عرفوا بعض كويس بالتليفون

المرحلة التاسعه " قعدة الخطوبة"

الاب: انت ايه مؤهلاتك يا ابني

يروح يخرج الحبيب شهادته بتلمع زي ما خدها اول يوم, وفعلا ما أثرش فيها لا مية ولا نار

هو: زي ما انت شايف يا عمي, أنا دك تووووووووووور, واهي الشهاده

الأب: تور ايه يا ابني, ما تحسن ألفاظك شوية

هو: دكتور يا فندم, اسف اصلي واخد دور كحة جامد

الأب: ألف سلامة عليكبس ايه اللي ممكن تقدمة لبنتي؟

هو: ما انا وريتك, هقدملها اللي هتجيبهولي الشهادة

الاب: شهادة ايه يا ابني, ما احنا عندنا واحده زيها متلقحه جوة, جابتلنا الفقر من ساعة ما دخلت البيت, تخيل ان البيت ولع مرتين وهي الحاجة الوحيدة اللي كانت بتطلع سليمة

هو: انت هتقوللي يا عمي, ما انا مجرب

الاب: عموما ما دام مش مستحملين واحده, ازاي هيبقوا اتنين في بيت واحد

هو: يا مسهل يا رب, ان الله يرزق من يشاء بغير حساب يا عمي

الأب: أنا آسف, بس مش هقدر اوافقك, دي عملية انتحار

تخرج البنت من غرفتهابس أنا بحبه يا بابا

الاب: خلاص, على بركة الله

المرحلة العاشرة

الخطوبة, ودي مرحلة مع نفسها, كل واحد وعلى حسب امكانياته, بعد كده بيتجوزوا ويجيبوا صبيان وبناتبس هشوفه من الصبيان والبنات دول دخل طب, وخصوصا طب سوهاج, , هيكون أجله على ايدي

وربنا يوفق كل حبيبة شارع مشرحه

;-)

ملاحظة:المراحل اللي قبل قعده الخطوبه حقيقة مية بالمية وما بعد ذالك مجرد تخيل مني