اسف علي الازعاج !!!

ابتدا العام الدراسي الجديد منذ حوالي اسبوعين .. ورجعنا لمعمعة المذاكرة من جديد والامتحانات اللي بتحرق اعصابنا علي الفاضي والمليان ... طبعا انا ما كتبتش حاجة جديدة من حوالي كده اسبوعين تلات اسابيع ... بس والله غصب عني اصل انا عقبال عندكم السنة دي دخلت سنة خامسة طب بتاع البشر ده .... وما ادراكم ما سنة خامسة!!! ... وكمان ادارة الكلية عندنا بتحب انها تجري تجارب البحث العلمي علينا نحن - فئران التجارب - فمرة يقلك سنة خامسة تدرس اطفال ونساء وتوليد ... ومرة يرجعوا يقولوا تطبيقا لمبادئ الجودة اللي ماشفناش منها حاجة حلوة من ساعة مااتطربقت علي نفوخنا ان طلبة سنة خامسة يدرسوا بـــــــاطــنـــــــــــــــة واطفال ... وطبعا اكيد الناس فاهمة يعني ايه بــــــــــــاطـــنـــــــــــــــــــــة ... ولو كنت ما تعرفش يعني ايه بـاطـنــــــــة؟؟ اشرحلك ... الباطنة مادة ذات ستة عشر كتاباً المفروض تذاكرهم في ستة اشهر وتراجعهم في شهر قبل ما يستلم الاساتذة الدكاترة الافاضل مهمة تقليم اظافرك وقص شعرك واصابتك بكل العقد النفسية والسيكلوجية التي تجعلك تكره اليوم الذي فكرت فيه ان تدخل بقدميك تلك الكلية وتحلم بان تكون طبيبا وذلك بعد ان ينجحوا في تحويل كل احلامك السعيدة الي كوابيس تسيقظ منها كل يوم مفزوعا ولا نملك في النهاية سوي ان نقول - حسبي الله ونعم الوكيل - ... طبعا انتوا متهيألكم اني بشد في شعري دلوقتي وانا بكتب الكلام ده ... احب اطمنكم اني لسه والحمد لله بكامل قواي العقلية والبدنية حتي الآن ... ولكن بصراحة ما اوعدكمش اني استمر كده لغاية اخر السنة !!! طبعا انا طولت عليكم وصدعتكم بس انا حبيت اشرحلكم انا ليه ماكتبتش حاجة جديدة من فترة بس ححاول اني انتظم في الكتابة والتواصل معكم .. بس لوغبت عليكم اسالوا عليا... طبعا انتوا اكيد عارفين عنوان الثرايا الصفرا ......
والله الموفق ،،،