أيوة مش مهم ... مالك تنحت كده , طب ركز واسمع كلامي وبعدين احكم براحتك عليا , نيجي بقى واحدة واحدة اوضحلك مفهومي بالضبط , وياريت تجاوب في البداية عالاسئلة دي....
1- ماذا تمثل لك المرأه؟
طبعا هاتجاوب الاجابة المثالية اللي علموهالنا في المدارس ... المرأة هي نصف المجتمع , هي امي وهي اختي وهي زوجتي وام اولادي , وانا اقولك شاطر يا حبيبي ... بس مش مستغرب ان الاجابة ما كانتش المرأة هي غشاء بكارة ؟؟!
2- ما اكثر ما يعجبك في المرأة التي سترتبط بها ؟
اكيد طبعا هتقوللي الدين , وطبعا بما انها فاهمة الدين تكون خلوقة , واكيد نسبها بالتالي هيكون بيشرف , وطول ما هي بتخاف ربنا هتعرف تسعدني ...
سبحان الله , برضه الاجابة ما كانتش غشاء البكارة !!!
3- طيب , نيجي بقى للحب , اول جملة هتقولها للبنت اللي انت معجب بيها ايه؟؟!
انا بحبك او معجب بيكي ونفسي نكون لبعض , او أي حاجة بنفس الاسلوب ده ...
يعني ببساطه مش هتقولها لو سمحت عندك غشاء بكاره؟ ... عشان اكيد هتديك بالقلم ساعتها وهتلم عليك الشارع.
يعني كده من الآخر من غير رغي كتير, المرأة هي كيان بشري , له عقل ومشاعر وجسد , ومن بين كل الحاجات العظيمة دي اللي كرمنا بها الله كبني البشر , بنحكم على المرأة عن طريق قطعه رقيقة جدا من الجلد مؤقتة الوجود , بمعنى ان لو واحد لذيذ ربنا كرمه ببنوته عاقلة ومتدينه وجميله ومحترمة وعندها غشاء بكارة , فالغشاء ده اللي هو شايفه اهم حاجة مش هيستحمل معاه غير ليله واحده, ومع انها هتفضل بعقلها وكيانها ومشاعرها وجسدها طول العمر معاه , بس تلاقي نوعية غريبة من البشر ممكن تحكم علاقة عمر بحاله بالاعدام حرقا وشنقا ورميا بالرصاص , لمجرد ان قطعة الجلد البسيطة دي غير متواجده في فتاة احلامهم , احلامهم ايه بقى , ده لما يعرفوا بالموضوع ده ساعتها تتحول لفتاة كوابيسهم , اللي ضحكت عليه واللي خدعته واللي خاينه واللي واللي...... ومش هنخلص من كلامه اللي هيخلي كل مساوئ الدنيا فيها , طب منين خدعتك وهي بترسيك عالحوار من الاول ؟ مش كده احسن من ما تفاجأ ليلة الدخلة بغياب هذا الجزء العظيم.
انا هنا باتكلم عن نوعين محدودين من البنات اللي فقدوا عذريتهم وبيتم ظلمهم من المجتمع ظلم شديد جدا , لمجرد ان مافيش ضمن محتوياتهم غشاء بكاره , والنوعين دول هما المغتصبات المطلقات الصغيرات في السن , الفئتين دول بجد اتظلموا في مجتمعنا الشرقي المتخلف , اللي لسه بيحمل جواه عادات شرقية لا يقبلها دين ولا عقل .
ياريت يا شبابنا تغيروا نظرتكم للبنات دي , وما تعاملهمش كأنهم آلات هتشتريها من سوق المستعمل , دول بشر من لحم وعضم وليهم مشاعر وعقول , واعتقد ان لو أي واحد فينا حط نفسه مكان واحده مغتصبة وتخيل الوضع اللي هي كانت فيه والحيوان اللي قصادها بياخد منها شهاده شرفها , ده غير الخوف والرعب منه لو كانت تحت تهديد السلاح, والخوف من مستقبل غامض وازاي حياتها هتتغير بعد الموقف , غير الآثار النفسية المترتبة على اسوأ انواع العلاقات الجنسية اللي عرفها التاريخ , هيقدرها ويحترمها زياده , ده كفاية اللي استحملته.
أما المطلقة بقى , اللي بتتحط عالهامش لمجرد ان شخص تاني خدها وما ععجبتهوش , وراح رجعها لبيت ابوها , وازاي البنت دي بتتأثر كل ما حد يقربلها ويعرف انها مطلقة يروح يبعد تاني , او يطمع فيها ويعتبرها فريسه سهلة وما عندهاش غشاء هتخاف عليه , ولا زوج هتخاف منه , وبيكون متناسي تماما ربنا اللي فوق كل الامور دي , تخيلوا وضعها هيكون ازاي ؟!
يا امهات ويا اخوات ويا شباب , ما تمنعوش أي اتنين على انهم يرتبطوا ببعض عشان حتة الجلد دي , الانسان اكرم من كده بكتير , والعلاقة الانسانية بين كل اتنين مبنية على المشاعر والافكار , وهي اللي بتفضل معانا طول العمر , وغشاء البكاره للأسف بيتم فضه في ثواني , وبيروح في طي النسيان , وماحدش بيفتكره بعدين , ومادام ثبت صحة دين واخلاق البنت دي , يبقى على بركة الله, وما تنسوش ...
قال الله تعالى ..
{ الخبيثات للخبيثين والخبيثون للخبيثات والطيبات للطيبين والطيبون للطيبات أولئك مبرءون مما يقولون لهم مغفرة ورزق كريم }
6 عبر مين قدك !!:
الظاهر اني انا اول تعليق
والتاني كمان عشان خاطرك ياضياء
والتالت عشان خاطر مصر اللي حتفوز بالتلاتة ان شاء الله
والرابع اقول فيه ... والله انا ممكن اتغاضي عن اهمية غشاء البكارة من حيث كونهالممثل الوحيد للمرأة .. فالمرأة ليست مجرد غشاء كل مهمتك ان تمزقه وتظفر منه ببضع قطرات من الدم .. ولكن المرأة كيان ارقي واعظم من ذلك بمراحل له احاسيسه وكيانه الذي يجب احترامه .. ولكنني اختلف معك في ان غشاء البكارة احد اهم مقاييس الشرف والعفة عند المرأة والا ما كان ليكون اهم عند المرأة من روحها ... ولذلك فليس علينا التخلي عن تلك الفكرة مهما حدث حتي لاتشيع الفاحشة في مجتمعنا تحت مسميات غربية من امثلة ان هذا الغشاء ليس مقياسا لعفة المرأة وشرفها ... وشكرا لك
انا مش معترضه على حاجه من كلامك غير اني اتمنى من حضرتك الرجوع لتفسير القرآن لتعرف تفسير الآيه لان ليس لها علاقه بالموضوع
بارغم من اني كنت اتمنى ان تعرض الموضوع بأسلوب آخر يتناسب مع شرقيتنا فهناك ميآت الاساليب لطرح موضوع كهذا
اشكرك
فتفسير الايه على ان الخبيث من النساء للخبيثين من الرجال والطيبات من النساء للطيبين من الرجال قال به القرطبي لكن............الصحيح ودليل عليه قوله تعالى"أولئك مبرءون مما يقولون" هو ان الخبييثات من الكلمات لاينطق بها الا الخبيثون من الرجال والطيبات من الكلمات لا ينطق بها الا الطيبون من الرجال وهذا ما قال به مجاهد وابن جبير وعطاء وأكثر المفسرين
.................
لو فكرت قليلا لوجدت الكثيرات من النساء الصالحات من رزقهن الله برجال عابثين وخبثاء والعكس صحيح
................
اتمنى ان اكون لم اثقل عليك وان يتسع صدرك لي
وان اكون قد افدتك بالقليل شكرا لك
إرسال تعليق