مقتطفات من كتاب مالوش اسم - أحمد العسيلي

- النجاح والنجومية من الجمهور آه , بس القيمة لأ ... الجمهور سهل جدا يرفع حد في السما وهو ما يستاهلش أو ينزل حد في أسفل سافلين وهو يستحق أكثر من كده بكتير .

- لو المطربين مفتقدين الفن بتاع زمن الفن الجميل , ما تعملو فن جميل انتوا كمان ., هو فيه حد حايشكوا ! . ولو الجمهور هو اللي مفتقد أغاني زمن الفن الجميل, ما تروحوا تسمعوها , ما هي موجوده ! هو في حد خبى المزيكا بتاعت زمان !.

- الأجيال السابقة من المصريين لا ينفكوا أبدا أن يذكروا قد ايه الأخلاق زمان كانت عظيمة ودلوقتي مابقاش فيه اخلاق ! .. مين بقى اللي عمل الحكاية دي ؟ مين مسئول عنها ؟ الشباب اللي بلا أخلاق ولا أهاليهم اللي ربوهم بطريقة غلط؟ .. يرد البعض يقولوا ( الأهل مش حسعملوا حاجة لوحدهم, فيه كمان المدرسة والجامعه بتأثر على ولادنا) . هو يعني المدرسة دي فيها كائنات فضائية ! المدرسة فيها نوعين من الناس , يا تلاميذ يا مدرسين , كويس ؟ المدرسين دول دايما بينتموا لجيل سابق للتلامذه , صح ؟ فلو التلاميذ باظوا بسبب المدرسين يبقى برضه الجيل السابق ده هو المسئول عن البوظان. بقية الناس اللي في المدرسة كلهم هم التلامذه, مش طالعين شيطاني , صح ؟ كل واحد فيهم جاي من بيت. البيت ده فيه مين ؟ فيه أهله. أهله دول منين ؟ من الأجيال السابقة برضه. فلو العيال دول بايظين يبقى مين اللي بوظهم؟ الأجيال السابقة هي اللي بوظتهم أو على الأقل سمحتلهم يبوظوا لإن هم اللي خلقوا البيئة اللي اتربوا فيها !

- لو نزلت الجامع اللي جنب بيتكو تقولهم وطوا صوت الميكروفون ده لإنه عالي ومزعج , حتلاقيهم واقفينلك كإنهم بيدافعوا عن الحضارة الإسلامية المنقرضه , مع إنهم بيدافعوا عن فعل قبيح ودميم ولا له أدنى علاقة بالدين , الإسلام مافيهوش ولا ميكروفونات ولا سماعات كبيرة ولا أصوات أحيانا أنكر من صوت الحمير وفاكرين نفسهم النقشبندي .

- البني آدم أصلا أصلا عايز يبقى حر , عايز يملك القدرة على الاختيار , عايز هو اللي ينقي . وبناء عليه يبقى يمكن واحد من أسباب اللي احنا فيه ده طريقة الجبر اللي بيمارسها البيت المصري على ابناؤه وهم صغيرين ولحد ما يكبروا. الطريقة اللي بتسلبهم ما اعطاه ربهم إليهم في فطرتهم, ومع الخسارة دي بيخسروا القدرة على دفع تمن أخطاءهم وتحمل مسئولية أفعالهم.