أفكار مبعثره مملة !

عندما تشعر أن مسار العالم كله يتغير من أجلك أنت فقط ... فاعلم أنه التوفيق من الله !
*****
محمد منير بيقولك ..." بينا للفرحة بينا بالحب ننسى كل اللي فاتنا , ويا الرحلة الطويلة ننسى اللي فات كله من حياتنا "... وده على اساس ان الحب بيتباع بالكيلو في السوق , ولا بيتاخد جرعات في العضل؟
*****
أنا موافق تماما على مشروع الجدار الفولاذي لكن بشرطين ... ان يحوط كل الحدود البرية لمصر ... وان تظل جميع المعابر مفتوحة بيننا وبين الدول المجاوره !
*****
ليه عربات السيدات في المترو دايما فاضيه? .... عشان بيركبوا مع الرجاله!
*****
ما اصعب ان تعيش في وسط حديقة ممنوع عليك استنشاق ازهارها , وتنظر إلى كل أولئك الذين يقطفون الزهور لعدم اكتفائهم من رائحتها ورغبتهم بالاحتفاظ بها , فلا تعلم ان كان من حقك ان تحسدهم , او ان تمنعهم!
*****
ما تقولش خدت ايه من مصر , قول هتدي ايه لمصر ... الاغنية دي عملوها عشان عارفين ان ماحدش واخد من البلد دي حاجة!
*****
يقولون ان بابا نويل لا يقدم الهدايا إلا لؤلئك الاشخاص الذين يؤمنون به , ولهذا فإنني لم ولن انتظر هداياه طوال حياتي!
*****
لما بشوف الفيلم الكوميدي " فيلم ثقافي " باستغرب حاجتين :
الاولى ... يا ترى لو كان النت "الدي اس ال " اشتغل قبل الفيلم , كان الفيلم ده هيتعمل ؟
والتانية ... يا ترى الناس اللي زي شخصية برايز "جوهري الافلام الثقافية " , بيشتغلوا ايه دلوقتي؟
*****
عندما يقلدك من هم أكثر خبرة منك , فاعلم انك تخطيت حدود النجاح!
*****
من أراد شيئا بشده ... هتلطع عينه الاول وياخد على قفاه لما يشبع ... وبعدين يا يجيله , يا ميجيلهوش من اساسه !

*****

في كثير من الاحيان ... تكون قلة الادب هي الحل!
*****
ان الواحد يعجب بمزة ده الطبيعي , لكن انه يحبها فدي المشكله!
الايجابية هي شخص ينظر في المرآه , يراقب كرشه الذي يزداد في الكبر , وذقنه اللي يزداد طولا , ووجه الذي يزداد كآبة , ولكنه يبتسم لأن شعر رأسه مازال في مكانه ولم يصب بالصلع بعد!
*****
امشي عدل ... مزتك تحتار فيك ... وبرضه هتطلع عنيك!
*****
أكثر ما اثار تعجبي هي قدرة المصريين على تحويل الفيس بوك إلى أكبر " قهوة شعبيه " على الانترنت !
*****
ان شاء الله في خطتي الانتخابية لعام الفين ومش عارف كام سنه , هيكون اهم موضوع بالنسبالي اني احول سكة الحديد الى سكه المونيوم , اهه عالاقل الالمونيوم ما بيصديش!
*****
من أسوأ الأشياء أن تقترف اخطاء ناتجة عن قلة الخبرة , ولكن الأجمل من ذلك هو أن هذه الأخطاء تضاف إلى خبراتك الجديده , فلا تقترفها مستقبلا !
*****
الدنيا علمتني ان البنات الحلوة كتير , بس اللي يعرف ينقي !
*****
اتسائل عن أولئك المنافقين الذين يضعون صور الرئيس مذيلة بأسماءهم الشخصية مع بعض الشعارات الرنانة اذا كانوا بتلك الدرجة من العته التي تجعلهم يعتقدون أن الرئيس يأبه لتلك الأشياء الصغيرة ... او انها قد تؤثر على عرشه بالزياده او النقصان ؟
*****
الشعب المصري جميل , احلى ميزة فيه , هي نفسها اوحش عيب ... انه دائما مستعد لتقديم التنازلات!
*****
لماذا يعتقد المصريون أن جهاز قياس الضغط هو الكاشف عن كل مرض , وانه اساس اي علاج , وان الطبيب الذي لا يقيس الضغط فهو طبيب فاشل؟
*****
يا ترى الناس بتقوم بعملية التنضيف ليه؟ ..... عشان تعرف توسخ تاني براحتها!

*****

تمت